第一篇日本威士忌酒廠一定要講講山崎蒸餾所。有日本威士忌故鄉既山崎酒廠係1923年由SUNTORY創立人鳥井信次郎(TORII SHINJIRO)所建立。
山崎蒸餾所位於大阪同京都之間既天王山山腳附近， 可以坐「JR山崎」或是「大山崎」站之後步行大約10~15分鐘到達。係好耐以前，山崎已經係連接京都和大阪的交通要道。鳥井信次郎亦都係因為交通便利，輸送成本低既原因，而決定係大阪大展拳腳。與此同時，山崎都係桂川、宇治川、木津川三川匯集既地方，係被稱為「水生野」既名水之地，戰國時代日本茶道宗師茶聖千利休，曾為豐臣秀吉建造茶室「待庵」，亦都係用山崎既水源泡茶。山崎優質既水源同潮濕既環境成就左陳年威士忌既非常好既條件。
要講到歷史背景，首先要提兩個人:
改良並研發日本風味既三得利(Suntory)威士忌創辦人 - 鳥井信治郎。
另外一位就係堅持蘇格蘭原味既余市(Nikka)威士忌創辦人 - 竹鶴政孝。
係明治維新時期，當時日本接受左各國文化影響，威士忌就係其中之一，鳥井先生發現左威士忌所帶來既洋風市場，於是，除左原本業務(紅酒及其他洋酒)，更開始研究創新日本風味的威士忌。鳥井先生用天價聘用左曾經係蘇格蘭學習釀酒技術既竹鶴先生擔任山崎所長，[竹鶴先生曾係University of Glasgow學習，又到HIGHLAND LONGMORN 酒廠一邊工作一邊學習，最後仲娶了一位蘇格蘭太太回到日本。]希望為日本威士忌帶黎新氣象。可惜兩人雖熱愛威士忌但觀點就唔太一樣，合作一段短時間就分道揚鏢。
山崎蒸餾所成立之時並唔係已經好似依家咁受歡迎，都經過一段時期既低潮。當時日本政府稅收係釀造後課稅而非現在既裝瓶前課稅，對於酒廠黎講係一個非常困難既經濟負擔，大家試諗下，每年酒液揮發，所交既稅項就會掉落咸水海。作為生意人既鳥井先生為左減少酒液揮發量，而直接減少釀製時間，於1929年提前推出左一枝叫「サントリー白札」的威士忌，隔年再推出廉價版「赤禮」。當時一眾酒友都覺得質素唔夠好，銷售成績唔達標，竹鶴先生更被調去其他酒廠，後來酒廠無預警突然倒閉，竹鶴先生1934年就到北海道，建造自己既理想王國 - 余市。而依家既山崎蒸餾就唔再提竹鶴政孝，酒廠後院雕塑亦只有鳥井信治郎同佢既次子 -曾擔任三得利董事長既佐治敬三。
而經過多年既經驗，係1984年60週年，「山崎」單一麥芽威士忌終於誕生，就係「山崎12年」單一麥芽威士忌 - 日本第一枝單一麥芽威士忌，亦都係最具日本風格既單一麥芽威士忌。去到近年，日本威士忌靡聲國際，連年奪得威士忌大獎。
P.S. 鍾意日本威士忌或山崎酒廠既酒友一定要去參觀，近年日本威士忌價格過高，接近去到不能夠日常飲用，而去到酒廠就可以以極抵價錢試飲到不同日本威士忌，而且仲會有一D特別既構成原酒有料試飲!
留言